Заменик-претседателот на Владата и министер за транспорт и врски Александар Николоски во Атина оствари средби со високи претставници на грчката Влада, при што во фокусот беа економската соработка, регионалното поврзување и големите инфраструктурни проекти.
На средбите со вицепремиерот Костис Хаѕидакис, министерот за инфраструктура и транспорт Христос Димас, алтернативниот министер за железнички сообраќај Константинос Киранакис и со раководството на пристаништето Пиреа, Николоски нагласи дека Македонија и Грција имаат историска шанса да изградат блиска економска соработка.
„Ако дадеме еден политички импулс, верувам дека можеме да станеме најдобри економски партнери во регионот“, истакна Николоски за МИА.
Меѓу проектите во преден план е изградбата на брза пруга која од Атина преку Скопје ќе води до Белград, Будимпешта и Виена, со што приходите на македонските железници би се зголемиле десеткратно, а транспортот на стоки од грчките пристаништа до Централна Европа би станал значително побрз.
Дополнително, со реализација на Коридорот 10-Д, патувањето од Скопје до Атина би се скратило од сегашни осум на околу пет часа.
Николоски најави дека двете страни веќе следната година ќе започнат со изградба на железничката врска, а истовремено се работи и на енергетско поврзување преку гасниот интерконектор и нафтоводот.
„Добрата економска соработка е и силен поттик за подобри политички односи. Македонија и Грција имаат бројни можности за заеднички развој“, порача Николоски.
