„Секако дека ќе разговарам со моите колеги од СПС што е најдобро за партијата во наредниот период. Мое лично мислење е дека е неопходно да се најде нов лидер на Социјалистичката партија на Србија“, изјави актуелниот партиски лидер Ивица Дачиќ откако изрази незадоволство од изборниот резултат на партијата
Лидерот на Социјалистичката партија на Србија (СПС), Ивица Дачиќ, синоќа изјави дека неговата партија не е задоволна од изборните резултати и дека, според него, треба да се избере нов лидер на СПС.
„Не сме задоволни од резултатот, вклучувајќи ме и мене како лидер на оваа коалиција. Секако дека ќе разговарам со моите колеги од СПС што е најдобро за партијата во наредниот период. Мое лично мислење е дека е неопходно да се најде нов лидер на Социјалистичката партија на Србија“,
изјави Дачиќ.
Освен со своите сопартијци, Дачиќ најави дека за ова прашање ќе разговара и со претседателот Александар Вучиќ.
„Не сакам да им нанесувам никаква штета на националниот и државниот интерес. Се разбира, за сето тоа ќе разговараме кога ќе заврши изборниот процес“,
додаде тој.
Дачиќ потсети дека на почетокот на кампањата однапред донеле одлука дека какви и да бидат изборните резултати, подготвени се да ја продолжат соработката и коалицирањето со Српската напредна партија (СНС), доколку тоа биде нивна одлука на сите нивоа.
Според последните ажурирани податоци од изборите што ги објави Републичката изборна комисија (РИК), изборната листа „Ивица Дачиќ – премиер на Србија“ е трета по бројот на гласови на парламентарните избори, со освоени 6,61 отсто од гласовите. На покраинските избори оваа листа освои 5,15 отсто од вкупниот број гласови.
Извор: 360stepeni.mk
