ЖЕНЕВА (АА) – Специјалната известувачка на Обединетите нации (ОН) за Палестина, Франческа Албанезе, изјави дека израелскиот премиер Бенјамин Нетанјаху, по кого Меѓународниот кривичен суд (МКС) издаде налог за приведување, треба да биде приведен доколку ја посети Полска, известува Анадолу.
Албанезе сподели објава на платформата Х во врска со дискусиите за посетата на Нетанјаху на Полска.
Потенцирајќи дека земјите членки на МКС се обврзани да ги приведат оние за кои судот донел одлука, Албанезе рече: „Полска, која ја осуди Монголија затоа што не го приведе рускиот претседател Владимир, треба да го приведе Нетанјаху доколку дојде во земјата. Селективната примена на законот ја поткопува универзалноста на меѓународната правда и мултилатерализмот.“
– Пристапот на Полска
Полскиот претседател Анджеј Дуда побара од Владата да се погрижи Нетанјаху да присуствува на настаните по повод 80-годишнината од ослободувањето на концентрациониот логор Аушвиц без да се соочи со приведување за воени злосторства во Газа.
Полскиот заменик-министер за надворешни работи Владислав Бартошевски пред повикот на претседателот Дуда изјави дека доколку Нетанјаху дојде во Полска, тој ќе биде приведен во согласност со обврските на земјата кон МКС.
МКС издаде налози за приведување на Нетанјаху и поранешниот министер за одбрана Јоав Галант на 21 ноември 2024 година, за воени злосторства и злосторства против човештвото извршени во Појасот Газа.
Лицата што беа држени во концентрациониот логор Аушвиц беа ослободени од војниците на Црвената армија на 27 јануари 1945 година. Аушвиц е симбол на холокаустот, за време на кој околу 6 милиони луѓе беа убиени во концентрационите логори.
Се претпоставува дека само во логорот Аушвиц биле убиени приближно 1,1 милион луѓе.
Извор: Anadolu Agency (AA)
