ИСТАНБУЛ (АА) – Американскиот специјален претставник за Сирија, Том Барак, денес изјави дека договорот за прекин на огнот меѓу Израел и либанската група Хезболах „не успеал“, јавува Анадолу.
„Најважно е дека имате договор за прекин на непријателствата што е на сила – но тој не функционира, нели? Затоа сега сите се обидуваме да ги откриеме причините зошто не успеа“, изјави Барак пред новинарите во Бејрут.
Конфликтот меѓу Израел и Хезболах, кој започна како прекугранична размена на оган, прерасна во целосна војна во септември 2024 година. И покрај договорот за прекин на огнот во ноември, израелската армија секојдневно извршува напади врз Јужен Либан, тврдејќи дека цел се активностите на Хезболах.
Според договорот, Израел требаше целосно да се повлече од Јужен Либан до 26 јануари, но рокот беше продолжен до 18 февруари откако Тел Авив одби да се придржува до договорот. Израел сѐ уште одржува воено присуство на пет гранични пункта.
Осврнувајќи се на безбедносната состојба во провинцијата Сувејда, на јужниот дел на Сирија, Барак повика да се овозможи сириската Влада да ја преземе својата одговорност.
„Она што се случи е ужасно, незамисливо. Но надежта е дека токму од тоа ќе произлезе побрзо решавање на овие прашања“, рече тој.
„Всушност, има сириска Влада, тие треба да бидат повикани на одговорност. Исто така, треба да им се даде одговорноста за која се таму.“
Американскиот претставник нагласи дека реакцијата на Вашингтон на случувањата во Сирија била исполнета со „неверојатна загриженост, болка, емпатија, помош и свесност за важноста на инклузивноста, особено кај младите и новоформирани владејачки ентитети што се обидуваат да ги вклучат малцинствата“.
„САД немаат никаква намера да го принудат Израел да направи што било. Како што сум рекол стотици пати – ние сме тука за да ви помогнеме да постигнете решение со вашите соседи,“ додаде Барак.
Извор: Anadolu Agency (AA)
