Експретседателот бараше судењето да почне во ноември в година – после изборите, а обвинителите сакаа процесот да стартува уште годинава
Судењето на поранешниот претседател на САД, Доналд Трамп, за лошо постапување со доверливи документи, ќе започне пролетта следната година.
Судијката Ајлин Канон го закажа судењето за 20 мај 2024,наспроти Трамп кој бараше процесот да започне во ноември идната година односно по претседателските избори на кои Трамп претендира повторно да биде кандидат на републиканците. Обвинителите, пак, бараа судењето да започне уште оваа година.
Датумот што го одреди судијката, значи дека сега ќе се поклопи и со кампањата на експретседателот која тој период се очекува да биде во полн ек.
77-годишниот Трамп се соочува со сериозни обвиненија поради чување на доверливи документи од Белата куќа во неговиот дом во Флорида.
Обвинителството тврди дека тој незаконски постапувал со доверливите податоци откако ја напуштил функцијата, а ги попречил и обидите на владата да ги добие документите.
Поранешниот претседател, пак, тврди дека е невин и за случајот тврди дека е креиран за да се уништи неговата изборна кампања.
Доверливите документи кои ги чувал Трамп, како што пренесоа медиумите претходно, се однесувале на: нуклеарните програми на САД, одбранбените и вооружени способности, потенцијалните слабости на САД и сојузниците при евентуален воен напад и планови за евентуална одмазда како одговор на напад од странски сили. Според деталите кои беа објавени, на неговиот луксузен имот во Палм Бич на Флорида дел од нив биле пронајдени и во салата за бал и во бањата.
Извор: 360stepeni.mk
