БЕЈРУТ (АА) – Бројни експлозии се слушнаа во Бејрут, главниот град на Либан, веднаш по обраќањето на израелскиот премиер Бенјамин Нетанјаху на Генералното собрание на Обединетите нации (ГСОН) во Њујорк, известува Анадолу.
По десетина експлозии густ чад се издига од јужниот дел на Бејрут.
Како што јави либанската новинска агенција ННА, цел на воздушните напади бил квартот Хурејк во регионот Дахиех, јужно од Бејрут. Се додава дека израелските воени авиони бомбардирале многу објекти во регионот Дахиех.
Министерството за здравство на Либан ги објави првите податоци за жртвите од новите воздушни напади извршени од израелската армија во областа Дахиех на југот на Бејрут.
Во соопштението се наведува дека најмалку 2 лица се убиени, а 76 се ранети во израелското бомбардирање на јужното предградие на Бејрут.
Се посочува дека во нападите се уништени 6 згради во регионот, а болниците ги повикале граѓаните да даруваат крв.
Портпаролот на израелската војска Даниел Хагари објави дека авионите го нападнале штабот на Хезболах во регионот Дахиех, во јужниот дел на Бејрут.
Израелските медиуми јавуваат дека цел на израелската армија бил генералниот секретар на Хезболах, Хасан Насралах.
Според израелското армиско радио, армијата истражува дали Насралах бил присутен на локацијата што ја бомбардирале израелските авиони, додавајќи дека во нападот биле користени „бункер-бомби“, наменети за уништување бункери и подземни простории.
Телевизијата Ал Манар, која е блиска до Хезболах, објави дека во нападот биле уништени четири згради.
Израелската телевизија Канал 13 објави дека официјален Тел Авив го известил Вашингтон дека ќе го нападне бејрутскиот кварт Дахиех.
Израелската армија, која од 8 октомври минатата година ги продолжува контролираните судири со Хезболах, од 23 септември изврши стотици воздушни напади врз градовите на југот на Либан, како и врз регионите Бека и Баалбек.
Според либанските власти, 775 лица се убиени во воздушните напади, додека речиси 150.000 се раселени поради бомбардирањето.
Извор: Anadolu Agency (AA)
