ИСТАНБУЛ (АА) – Најмалку четири лица загинаа, а 43 се повредени во руски ракетен напад во текот на ноќта во градот Криви Рих во југоисточниот украински регион Днепропетровск, соопшти денес локален официјален претставник, јавува Анадолу.
„Жена повредена во нападот на Криви Рих почина синоќа во болница. Загинаа вкупно четири лица, 43 се повредени“, соопшти гувернерот на Днепропетровск, Серхиј Лисак, преку Телеграм рано утрово.
Лисак рече дека од повредените 12 биле деца, а 20 од повредените се задржани во медицинските установи.
„Во градот оштетени се повеќе од дваесетина високи згради, две градинки и училишта, едно претпријатие, административна зграда, продавница и магацин“, додаде гувернерот.
Коментирајќи го нападот, украинскиот претседател Владимир Зеленски преку платформата Х истакна дека спасувачките операции во Криви Рих се завршени.
„Секој ден нашите градови и села се подложени на такви напади. Секој ден Украина губи луѓе поради руското зло. И не може да има пауза во поддршката ниту за еден ден, една недела – а камоли месеци – кога станува збор за заштитата на животите и едноставно спасувањето на луѓето од теророт“, додаде тој.
Руско-украинската војна, која на крајот на минатиот месец влезе во третата година, според најновите податоци на Обединетите нации, ги однесе животите на најмалку 10.500 цивили, а над 19.800 се повредени.
Извор: Anadolu Agency (AA)
