ИСТАНБУЛ (АА) – Најмалку 25 лица загинаа во Мјанмар и едно лице во Тајланд, а 43 се исчезнати откако силен земјотрес со интензитет од 7,7 степени го погоди регионот Сагаинг во Мјанмар денес, јавува Анадолу.
Според Геолошкиот институт на САД, првиот потрес бил проследен со уште еден земјотрес со јачина од 6,4 степени само 12 минути подоцна.
Во тајландскиот главен град Бангкок се урнала висококатница во изградба во округот Чатучак, при што едно лице загинало, а 43 се затрупани под урнатините, пренесе Таи ПБС.
Во градот Таунгу во Мјанмар се урнал манастир, при што загинале пет деца, јави Елевен Медија Груп.
Најмалку 20 лица го загубиле животот во џамијата „Шве Фо Шинг“ во регионот Мандалај за време на петочната молитва, објави Кит Тит Медија.
„Џамијата се урна додека се молевме. Урнати се околу три џамии. Има затрупани луѓе. Засега бројот на загинати е најмалку 20, но можно е да биде уште поголем“, изјави еден од спасувачите.
Спасувачките екипи продолжуваат со потрагата по преживеани.
Историскиот мост Ава во Мандалај, исто така, се урнал во земјотресот, а оштетен е и историскиот дворец во Мандалај.
Државната телевизија МРТВ, повикувајќи се на изјава од Државниот административен совет, соопшти дека Националниот комитет за управување со катастрофи прогласил вонредна состојба во погодените региони: Сагаинг, Мандалај, Магве, североисточната држава Шан, областа Нај Пи Та и регионот Баго.
Тајландските власти, исто така, прогласија „вонредна зона“ во Бангкок по земјотресот, објави тајландскиот ПБС њуз.
Во Нај Пи Та, главен град на Мјанмар, голема болница примила многу повредени лица.
Двата земјотреса, со длабочина од 10 километри, предизвикаа прекин на мобилната комуникација.
Локалните медиуми споделија фотографии од оштетени згради и патишта, а потресите беа почувствувани и во соседните земји.
Извор: Anadolu Agency (AA)
