Најмалку 16 загинати и 8 исчезнати во поплави и свлечишта во Индонезија

ЏАКАРТА (АА) – Според првичните информации, најмалку 16 лица ги загубија животите, а 8 се водат како исчезнати во поплавите и свлечиштата предизвикани од поројните врнежи на индонезискиот остров Јава, известува Анадолу.

Индонезискиот национален центар за катастрофи објави дека поради прекумерните врнежи островот Јава го зафатиле поплави и свлечишта.

Во соопштението се наведува дека неповолните временски услови и нерамниот терен ги забавиле напорите за потрага и спасување, а според првичните информации, животот го загубиле најмалку 16 лица, а осум лица сѐ уште се водат како исчезнати.

Националниот центар за катастрофи наведе дека во околните болници продолжува лекувањето на 11 лица кои се спасиле од катастрофата.

Сезонските врнежи во Индонезија, кои можат да траат од октомври до март, честопати предизвикаат поплави и свлечишта.

Индонезиската Влада соопшти дека сака да го пресели главниот град Џакарта, бидејќи неговото население од 10 милиони е погодено од природни катастрофи, како што се годишните поплави, инфраструктурни проблеми и прекумерна експлоатација на подземните води, што предизвикува брзо да тонат северните делови на градот.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.