ГАЗА / ИСТАНБУЛ (АА) – Најмалку 15 цивили се убиени, а повеќемина повредени во израелските напади низ Појасот Газа од утринава, според медицински извори, јавува Анадолу.
Во израелските напади се убиени пет лица во населбата Ал-Сафтави во северниот дел на градот Газа.
Шест други беа убиени, а десетици повредени во неколку израелски напади врз населбите Тел ал-Хава, Ал-Туфа и Шуџаја во истиот град.
Во централниот дел на енклавата, израелската Армија гаѓаше возило кое се користело за дистрибуција на вода во бегалскиот камп Нусејрат, при што е убиено едно лице, а други беа повредени.
Израелските беспилотни летала убија еден Палестинец, а повредија други во шатор во кој се засолнувале раселените Палестинци во областа Ал-Маваси во Кан Јунис.
Двајца други се убиени во израелски оган додека чекале помош на американско-израелски центар за дистрибуција на помош во западна Рафа, во јужниот Појас Газа.
Отфрлајќи ги повиците за прекин на огнот, израелската Армија продолжи со бруталната офанзива врз Појасот Газа што ја започна на 7 октомври 2023 година, во којашто досега се убиени речиси 58.000 Палестинци, повеќето од нив жени и деца.
Меѓународниот кривичен суд, минатиот ноември, издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата поради своите воени дејства против енклавата.
Извор: Anadolu Agency (AA)
