Најмалку 10 загинати во руските ракетни напади врз украинските градови во текот на ноќта

ИСТАНБУЛ (АА) – Бројот на загинати во серијата руски ракетни напади врз украинските градови се искачи на 10, соопшти денес украинскиот министер за внатрешни работи Ихор Клименко, пренесува Анадолу.

Преку Фејсбук, Клименко рече дека Русија утрово извршила ракетни напади врз градовите Днипро, Уман и Украинка.

Како што истакна, еден од проектилите погодил стан и магацински објект во Уман, на околу 190 километри јужно од главниот град Киев.

„Десет лица, меѓу кои и деца, ги загубија животите во нападите, а 9 лица се хоспитализирани“, рече тој мислејќи на жртвите во централниот град Уман.

„На повредените моментално им се укажува лекарска помош“, изјави Клименко, и додаде дека спасени се три деца.

„Во Днипро, една жена и едно тригодишно дете ги загубија животите во најновите напади врз градот“, рече градоначалникот Борис Филатов, додавајќи дека било употребено „оружје со висока прецизност“.

„Оружје со висока прецизност… уште еднаш уби цивили во Днипро“, соопшти Филатов преку Фејсбук.

„Силите за противвоздушна одбрана на Украина синоќа уништиле 11 руски проектили и две беспилотни летала на пат кон Киев“, истакна Серхиј Попко, шеф на градската воена управа на Киев.

Русија, исто така, рано утринава лансирала ракети и од регионот на Каспиското Море, соопштија украинските власти.

Врховниот командант Валериј Залужњи на Телеграм истакна дека 21 од 23 крстосувачки проектили и две оперативно-тактички беспилотни летала „се уништени од противвоздушните противракетни единици на украинските воздухопловни сили во соработка со системите за противвоздушна одбрана на другите елементи на нашите одбранбени сили“.

Генералштабот на вооружените сили на Украина соопшти дека во изминатите 24 часа Армијата успешно одбила 65 руски напади врз подрачјата на Бахмут, Авдиивка и Марјинка.

Армијата истакна дека Русија лансирала осум проектили и извела 31 воздушен напад, како и дека испукала 56 парчиња муниција од повеќе ракетни фрлачи, врз украинските воени и цивилни позиции.

„Цивили настрадаа, приватни станбени згради и друга цивилна инфраструктура се уништени и оштетени“, соопшти Армијата.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..