Над 730 мигранти пристигнаа на грчките острови Крит и Гавдос за помалку од 24 часа

За помалку од 24 часа, 731 мигрант, вклучувајќи многу семејства и деца, пристигнаа на островите Крит и Гавдос, објави грчкиот весник „Катимерини“.

„Засолништето во Агија беше испразнето од оние што пристигнаа на 5 јуни, а сега е повторно полно“, изјави Елена Зервудаки, заменик-градоначалничка за социјална политика во градот Ханија на островот Крит. Повеќето од мигрантите се од Египет, Судан, Еритреја и Пакистан, кои тргнале од Тобрук во Либија, објави „Катимерини“.

Дипломатските тензии со Либија ја комплицираат соработката по прашањата за миграција, наведува весникот.

Пристигнувањата мигранти од Турција на егејските острови нагло се зголемија, а турскиот претседател Реџеп Таип Ердоган го предупреди германскиот канцелар Фридрих Мерц дека последиците од израелските напади би можеле да влијаат на регионот и Европа во однос на миграцијата, објави „Катимерини“.