Над 50 луѓе загинаа, а десетици се водат како исчезнати откако пренатоварен брод се преврте во река во провинцијата Екватер во Демократска Република Конго, објави денес националната телевизија, пренесува Анадолу.
Бродот превезувал околу 100 патници кога потонал во реката Конго во текот на ноќта кон вторникот, во близина на Мајита, град што се наоѓа на околу 40 километри од градот Мбандака.
„Над 50 мртви е привремениот биланс во потонувањето“, изјави за националната телевизија РТНК, Мајтре Коломба Мампунија, провинцискиот шеф на Екваторската дивизија на Црвениот крст.
Бродот „Фортуна ХБ Џадо“, кој се движел кон пазарот Мобензани во територијата Бомонго од Мбандака, се превртел кога неговиот покрив се урнал за време на маневрите за закотвување, се наведува во вестите.
Мбојо Лојоко, комесарот за речен транспорт на Мбандака, ја припиша трагедијата на непочитување на стандардите за навигација, меѓу кои главно на преоптоварувањето и ноќната пловидба.
Бобо Болоко Болумбу, гувернерот на провинцијата Екватер, за новинарите изјави дека испратил тим на Црвениот крст на местото на трагедијата, каде што продолжува потрагата по неколку лица кои сѐ уште не се пронајдени.
Извор: Anadolu Agency (AA)
