Во рамките на Фестивалот на народни инструменти и песни „Пеце Атанасовски“ кој викендов ќе се одржува на Рудина, Долнени кога ќе настапат околу 300 изведувачи на народните инструменти и песни, денеска во ликовниот салон од прилепскиот центар за култура „Марко цепенков“ се востанови Ден на гајдата и се одржа Симпозиумот на кој беше промовиран зборникот на научни трудови „Фолклорот во минатото и денес“.
Многу е значајно што гајдата како изворен инструмент и нејзиното правење се најдоа на листата на УНЕСКО како заштитено културно нематеријално богатство. Фестивалот кој ги негува и ги зачувува изворните традиции има посебен пиетет спрема гајдата: го носи името на светскиот гајдаџија Пеце Атанасовски, се одржува во Долнени, лулката на гајдаџиството и како главна награда ја доделува Гајдата на Пеце за најдобриот гајдаџија.
-Влегувањето во УНЕСКО за гајдата не е само придобивка за македонската традиција, за македонскиот народ, туку и за оние простори каде македонската гајда е присутна. Нашите уметници ја презентирале гајдата низ светот. Инаку Македонија има многу изработувачи на гајдата. Порано во Прилеп имало бројни работилници, а до денес познатиот прилепски мајстор Љубен Јурутоски ја изработува Гајдата на Пеце што се доделува како главна награда на Фестивалот. Затоа Фестивалот на народни инструменти и песни „Пеце Атанасовски“ е нераскинливо врзан за гајдата како репрезентативен изворен инструментм рече професор д-р Горанчо Ангелов, етномузиколог од Факултетот за музичка уметност при Универзитетот „Гоце Делчев“ од Штип и член на извршниот одбор на Фестивалот.
Денеска на Симпозиумот во ликовниот салон на Центарот за култура „Марко Цепенков, уметничкиот директор на Фестивалот, професор д-р Родна Величковска го презентираше шестиот зборник на научни трудови „Фолклорот во минатото и денес“. Дванаесет научници од фолклористиката ги претставија своите истражувања за спознавање и зачувување на богатиот македонски фолклор.
Утре и в недела на Рудина, Долнени, околу 300 учесници од сите краишта на Македонија ќе го разлеат изворниот мелос, а најдобрите жири комисијата ќе ги награди.
Во рамките на Фестивалот е и Семинарот за изучување на народните инструменти и песни. Годинава 20-тина млади покажаа интерес да го изучуваат изворниот мелос. Учествуваат и гости од Австрија, од македонскиот оркестар „Александар“ кои вечер на летната сцена при центарот за култура „Марко Цепенков“ ќе одржат ревијален концерт.
ИЗВОР: racin.mk
