ИСТАНБУЛ (АА) – Во Истанбул, Туркије, се одржа првиот самит на Радиодифузната унија ТРТ – Африка, и свечена церемонија на која е претставена ТРТ Африка, новата платформа за дигитални вести на турскиот јавен сервис ТРТ, јавува Анадолу.
Платформата ќе функционира во согласност со целите на ТРТ за непристрасно новинарство и на светската јавност ќе ѝ презентира приказни од вториот најнаселен континент во светот.
Платформата ТРТ Африка ќе биде достапна на четири јазици: свахили, англиски, хауса и француски.
ТРТ Африка е најновиот член на семејството на ТРТ, кое ги вклучува ТРТ Ворлд, ТРТ Арабик, ТРТ Рашан, ТРТ Дојч, ТРТ Франсе и ТРТ Балкан.
На церемонијата присуствуваа голем број турски и странски претставници, меѓу кои и шефот на Канцеларијата за комуникации при Кабинетот на претседателот на Туркије, Фахретин Алтун, генералниот директор на ТРТ, Мехмет Захид Собаџи, и извршниот директор на Африканската радиодифузна унија (AUB), Грегоир Нџака.
Алтун во своето обраќање пред присутните особено го нагласи значењето на борбата против дезинформациите.
„Со оглед на тоа што сите опасни групи, од глобалните банди до терористичките организации, се сè повидливи и дека нашите држави се сè повеќе изложени на систематски дезинформации, кои се една од најчесто користените алатки на таквите структури, мораме заедно да креираме поле на отпор против тие структури и нивните систематски обиди за дезинформирање на јавноста“, рече Алтун.
Изрази надеж дека програмата во Истанбул дополнително ќе ги продлабочи односите меѓу Туркије и африканските земји и ќе ги зголеми можностите за соработка.
Алтун додаде дека Туркије под водство на претседателот Реџеп Таип Ердоган во последните 20 години презеде многу важни чекори во развојот на пријателството и соработката со африканските држави.
Како што истакна, односите на Туркије со африканските држави се засновани на принципите на меѓусебно разбирање, доверба и рамноправно партнерство.
Генералниот директор на ТРТ, Собаџи, изјави дека ТРТ со бројни содржини и понатаму ќе ја одржува позицијата на еден од најважните глобални медиумски актери.
Истакна дека платформата за дигитални вести ТРТ Африка е најновото достигнување на оваа медиумска куќа кон Африка.
„ТРТ во денешниот глобален комуникациски систем, во кој се испреплетени вистината и лагата, реалноста и илузијата, врз основа на принципот на правичност, каде во фокусот е човекот, пренесува вести на седум континенти во светот, на 41 јазик и дијалект“, рече Собаџи и додаде:
„Ние разговараме рамноправно со нашите африкански пријатели и деловни партнери. Посебно би го истакнал следново, ТРТ Африка настана како резултат на конструктивниот и пријателски пристап на Туркије кон Африка во медиумскиот сектор, за разлика од Западот.“
Тродневниот самит на Радиодифузната унија ТРТ – Африка започна на 30 март.
Извор: www.aa.com.tr
