Министерството за спорт ќе биде главен покровител на силниот Меѓународен турнир најавен како големиот спектакл во ММА борби што ќе го организира Македонската ММА федерација на 6 септември годинава во Скопје.
На денешната прес-конференција во Министерството за спорт беше истакнато дека еден ваков настан ќе значи голема промоција на боречките спортови збогатување на спортската понуда. На ММА турнирот во Скопје најавено е учество на неколку истакнати имиња во вој спорт меѓу кои и познатиот македонски борец Горјан Гого Славески кој настапува во САД, како и на најдобрите македонски натпреварувачи – Даниела Алексовска, Марко Трајановски, Дино Сарчевиќ.
-Како Министерство за спорт одлучивме да го поддржиме овој настан кој ќе овозможи во Македонија да дојдат борци кои се познати во овој спорт, но и како една ретка можност за публиката да ги види сите оние идоли или потенцијални идоли кои ќе бидат присутни и ќе се борат на овој ММА спектакл. Сигурен сум дека сѐ ќе помине во најдобар ред. Подготвени сме во иднина да одиме и чекор понатаму и можеби веќе на следниот ММА настан во Македонија да го видиме и Александар Волкановски. Ние како Министерство за спорт и како држава секогаш ќе стоиме на страната на спортот и на вистинските насоки во општеството. Без разлика што се работи за боречки вештини, секогаш ќе поддржуваме промоција на спортот, на чистиот и на вистинскиот спорт – истакна министерот Борко Ристовски.
Претседателот на Македонската ММА федерација, Ивица Алексовски, потенцирајќи дека ММА спортот во последените години е во голем подем во светот, најави дека претстојниот спектакл во Скопје ќе биде првенствено за промоција на најдобрите македонски натпреварувачи во овој спорт, но и можност за публиката да ужива во квалитетни борби.
-Многу ми е мило што Министерството за спорт ги виде успесите што ги имаме во последниве две години и го препозна квалитетот што го имаме, но и потенцијалот на овој спорт. Како федерација, сакаме да го подигнеме овој спорт на повисоко ниво и токму со таа цел на 6 септември ќе го организираме овој ММА спектакл кој ќе се пренесува во живо на Арена фајт каналот. Стартно најавуваме 12-13 борби и еден малку поинаков спектакл каков што немало во Македонија во последниве десетина години – рече Алексовски.
Извор: kurir.mk
