Претседателот на ВМРО-ДПМНЕ, Христијан Мицкоски, во вечерашното гостување во поткастот „Проверитас“, истакна дека очекува убедлива историска победа на кандидатите за градоначалници кои доаѓаат од редовите на ВМРО-ДПМНЕ, а бројката смета дека ќе биде меѓу 40-50 градоначалници и Град Скопје.
„Очекувам убедлива победа повторно на ВМРО-ДПМНЕ и коалицијата. Очекувам минимум помеѓу 45-50 градоначалника плус главниот град Скопје. Сега имавме точно 42. Некои ми викаат дека сум песимиста, некои велат ќе имаме и повеќе. Јас навистина не знам колку е тоа повеќе, но еве очекувам да имаме, би рекол, историски резултат. Затоа што граѓаните чувствуваат, дека искрено сме влезени и сакаме да направиме, и даваме се од себе за да направиме. Имаме точна прецизна кампања со јасна порака, кампања која што нуди решенија. Не е црна кампања, не е кампања со ad hominem напади, вели Мицкоски.
Претседателот Мицкоски се осврна на кампањата за локалните избори која што ја води коалицискиот партнер во Владата, ВРЕДИ, и рече дека кандидати за градоначалници на ВРЕДИ нудат проекти и стратегии за развој на општините, за разлика од ДУИ кои се уште продолжуваат со политика на поделби и личен интерес.
„Слушам одредени нивни пораки, тие пораки се во рамките на тоа кое што го очекувам. Мене ми е навистина драго, што конкретно Вреди или ВЛЕН, е фокусиран на проекти. Нивните кандидати за градоначалници зборуваат за проекти, за стратегија, што ќе направат во својот мандат. Тоа не можете да го слушнете од нивните конкуренти, ДУИ, кај нив само една е пораката, поделба и обид да се огради својот терен на интерес. Мислам дека е, како што кажав претходно погрешно, но ќе видат самите многу скоро“, дециден е Мицкоски.
Извор: kurir.mk
