Мицкоски и Дамева седнаа на заедничка маса. По јавниот повик на Премиерот за идеи и предлози како да се реформира правосудниот систем денеска на иницијатива на Претседателката на судскиот совет се одржа средба во Владата, но нема одговор – какви конкретни предлози биле изложени на маса.
Дамева по средбата која траеше помалку од еден час, на прес конференцијата одби да одговара на прашања, а во кусата изјава порача дека граѓаните заслужуваат правна држава и дека се надева дека денешната средба ќе вроди со плод.
Весна Дамева – Претседателка на Судски совет
„Средбата беше иницирана од Судскиот совет, з дадеме конструктивни предлози за враќање на довербата во судството. Судската и извршната власт сметам дека не треба да се гледаат како соперници, туку како соработници, бидејќи таа институционална соработка е важна за наредните резултати. Граѓаните заслужуваат, а ние треба да обезбедиме правна држава. А тоа може да се стори со меѓуинституционална соработка и преземање дејствија во рамки на својата надлежност “
Премиерот Мицкоски пак порача дека останува на ставот дека Судскиот совет како и Советот на јавни обвинители треба да се распуштат, но рече дека е отворен да слушне идеи и доколку идеите се добри да се имплементираат. Не очекува брзи резултати, но очекува напредок.
Средбата се одржа во време кога судството особено последните денови повторно предизвика контроверзи во јавноста по одлуките на кривичниот судија Пајазит Пајазити, во случаите со поранешниот борец на ОВК Рамадани и со поранешниот јавен правобранител и министер за правда Мемети. Поради тоа за Пајазити, судскиот совет во петокот формира комисија која треба да утврди дали тој во овие случаи постапил законски и објективно.
Извор: 24vesti.mk
