„Се чека банките да се произнесат во однос на каматната стапка и нивната можност таа да биде на пониско ниво и од 3,25%, како и да се утврдат некои детали во однос на критериумите“, рече министерката за финансии Гордана Димитриеска-Кочоска, во врска со каматите за Унгарскиот кредит.
Таа посочи дека целта на Владата е да договори со банките и тие да имаат „општествена одговорност“, за да се поттикне поголемо инвестирање. Според министерката за финансии, барањето на премиерот Христијан Мицкоски за „општествена одговорност“, е затоа што и банките треба да одат во делумно субвенционирање на каматата.
„Премиерот имаше еден нов предлог. Ќе видиме како ќе се произнесат банките. Ние секако ќе ја субвенционираме каматата, но да видиме колку ќе можат банките пониско да ги пласираат средствата, дури и под 3,25%“, рече министерката, Димитриеска Кочоска.
Таа потенцира дека не станува збор за субвенционирање на каматата на компаниите кои ќе ги земат кредитите, туку дека фирмите треба да платат пониска камата од сегашната просечна, по која ги добиваат средствата од банките.
„Фирмите ќе плаќаат камата која ќе биде пониска, од она што во моментот го добиваат од комерцијалните банки, во просек 4,9%. Сега ќе имаат можност да добијат дури и пониска камата од 3,25%“, рече министерката, во интервју за Сител.
ИЗВОР: racin.mk
