На прес-конференцијата која се одржа во просториите на Фудбалската федерација на Македонија,, селекторот на нашата фудбалска репрезнтација Благоја Милевски го објави списокот за продолжувањето на евро-квалификациите.
Сепак, Милевски доби прашање поврзано со Стефан Ристовски, кој одби да настапува за националниот тим поради одредени несогласувања со стручниот штаб.
Капитенот на Македонија пред две недели јавно проговори за проблемите во националниот тим и рече дека привремено го „замрзнува“ своето учество во таборот на „рисовите“. Селекторот изјави дека отпатувал во Загреб и разговарал со Ристовски, но неговата одлука останала непроменета.
„Мојата почит е огромна за сите репрезентативци. Јас отидов во Загреб да разговарам со Стефан и мојата идеја е да тој да остане лидер и капитен на тимот. Разговорот беше конструктивен, иако имавме различни мислења за некои работи. За жал, тој нема да биде дел од репрезентацијата, но тоа не значи дека мојата почит за него ќе се изгуби.
Единствено што ме разочара е дека за сето тоа дознав преку социјалните мрежи, но во секој случај, ја почитувам неговата одлука и ќе се обидеме да се спротивставиме на противниците со сите расположливи сили“, рече селекторот.
Македонија се подготвува за тешкиот квалификациски дуел против репрезентацијата на Италија. „Рисовите“ ќе истрчаат на теренот без капитенот Ристовски и ќе се обиде да се прикаже во добро светло против актуелниот европски шампион.
ИЗВОР: kurir.mk
