Меѓупалестинскиот состанок треба да се одржи во Москва од 29 февруари до 1 или 2 март, а поканети се претставници на милитантните групи од Појасот Газа – Хамас и Исламски џихад, изјави специјалниот пратеник на рускиот претседател Владимир Путин за Блискиот Исток и Африка, кој е и заменик министер за надворешни работи, Михаил Богданов.
„Ги поканивме сите палестински претставници – сите политички сили кои имаат свои позиции во различни земји, вклучувајќи ги Сирија и Либан и другите земји во регионот“, рече Богданов.
Тој додаде дека составот е приближно ист како и на претходните две меѓупалестински средби, односно поканети се 12 до 14 организации.
Според Богданов, целта на Москва е да им помогне на различните палестински сили да се договорат за обединување на нивните сили во политичка смисла.
„Поаѓаме од фактот дека Палестинската ослободителна организација беше и останува легитимен претставник на палестинскиот народ, таа беше прифатена од меѓународната заедница и од нас“, додаде Богданов.
Извор: 24vesti.mk
