Кандидатот на коалицијата ВЛЕН за градоначалник на Општина Чаир, Изет Меџити, го претстави новоизграденото кошаркарско игралиште во населбата Гази Баба, оценувајќи го проектот како значаен чекор во насока на поддршка на младите и развој на спортот во заедницата.
„Новото кошаркарско игралиште што штотуку го изградивме ќе биде место каде што нашите деца ќе растат во духот на натпревар, тимска работа и успех. Секој постигнат кош е чекор кон самодоверба, кон соништата што започнуваат од нашите улички и водат кон големите арени,“ изјави Меџити.
Тој нагласи дека ваквите инвестиции претставуваат повеќе од инфраструктурни зафати – тие се вложување во духот и иднината на младите генерации. „Ние веруваме во младите на Гази Баба. Затоа инвестираме во спортска инфраструктура, во простории кои внесуваат живот во нашите маала и проекти кои ја прават населбата посилна и поубава,“ додаде Меџити.
Кандидатот на ВЛЕН истакна дека новото игралиште е само почеток на поширока стратегија за развој на спортската инфраструктура и младинските активности во општината.
„Ова е Гази Баба – активна, жива, со позитивна енергија и визија за иднината. Ова е нашата политика: да градиме, да развиваме и да им овозможиме на сите деца да растат со достоинство и страст. Кошаркарското игралиште е само почеток. Големата победа е онаа на Чаир,“ порача Меџити.
