Не станува збор за реваншизам – тврдат владини претставници откако стана јасно дека се води истрага против поранешниот прв вицепремиер од редовите на ДУИ, Артан Груби, како и екс-директорот на Лотарија, Перпарим Бајрами.
„Ние начелно сме договорени и стоиме на тоа – бескомпромисна борба против корупцијата, но не реваншизам, мултиетничка, и без паради пред нивните семејства и деца.“, вели Изет Меџити.
Премиерот Христијан Мицкоски им се извини на граѓаните поради непријатностите на кои сведочеле додека се одвивале трите акции од последните 24 часа – против поранешните функционери заради злоупотреби во Лотарија, против припадниците на кланот Беланоца, како и за сузбивањето на терористичка ќелија.
„Ние кажавме дека ќе има силна, робустна борба против криминалот и корупцијата, за коишто постојат основани сомневања дека се случиле.“, вели Христијан Мицкоски.
Премиерот додаде дека ќе бидат откриени и обелоденети многу случаи од минатото.
„Сите овие акции ги спроведовме заедно со нашите партнери, буквално во целосна координација бевме.“, вели Христијан Мицкоски.
Реакција од ДУИ за последната акција на МВР нема, а Груби пред само четири дена се повлече од политичкиот живот откако заврши на американската црна листа. Премиерот претходно неколкупати во јавноста истакнуваше дека секој што ќе постапува незаконски ќе одговара, без разлика дали станува збор за актуелен или поранешен функционер. Последната голема акција на МВР и Обвинителство беше насочена против минатото раководство на РЕК Битола и ЕСМ, за што од СДСМ истакнаа дека го поддржуваат секој чекор за расчистување на евентуални злоупотреби и повикаа Обвинителството и институциите да постапуваат без селективност.
ИЗВОР: ТВ 21
