Меџити: ДУИ се зазема за враќање на Груевски – Касами: Османи го злоупотребува претседателството со ОБСЕ

Тројцата лидери на опозицискиот блок Изет Меџити, Биљал Касами и Африм Гаши од старата скопска чаршија упатија обвинувања до власта, а особено кон ДУИ. Лидерот на Движењето Беса, Биљал Касами, го обвини Бујар Османи дека се обидел да го злоупотреби претседавањето со ОБСЕ за да влијае на бројот на набљудувачи во изборниот процес.

„Имаме одредени информации дека Бујар Османи се обидел да го злоупотреби претседавањето со ОБСЕ, да влијае на одлуката за бројот на набљудувачи од ОБСЕ за изборниот процес. Јасно ставаме до знаење дека точно знаеме што се подготвени да направат за да се обидат да го заштитат своето незаконски стекнато богатство“, вели Касами

Од друга страна, претседателот на ДД Изет Меџити рече дека ДУИ е спремна за враќањето на Груевски да се пазари, за да може да си обезбеди место во идната Влада дури и ако ги загубат изборите.

„Нашите извори велат дека ДУИ одамна се откажала од уставните измени и дека единствената причина поради која толку се залага за враќање на Груевски е пазарењето со раководството на ВМРО-ДПМНЕ. Се надеваат дека Груевски и да ги загубат изборите ќе обезбеди позиција за создавање широка влада за која ќе преговараат и со пратениците на СДСМ“, вели Изет Меџити, претседател на ДД.

Во меѓувреме, претседателот на ААА, Африм Гаши, рече дека имаат три услови во однос на уставните измени. Првиот услов е патот кон ЕУ без никаков компромис, без разлика кој ќе победи на изборите во македонскиот табор, вториот услов е уставниот амандман за незастарување на случаите за злоупотреба на службената положба и третиот услов, според Гаши, е отстранувањето на 20% од уставот како формулација која се однесува на албанскиот јазик.