Судирите следуваат откако пратениците во грузискиот парламент го поддржаа првото читање на нацрт-закон за странски агенти за кој критичарите велат дека ќе ѝ наштети на слободата на печатот и ќе ја турне земјата кон авторитаризам
Втор ден по ред на улиците на главниот град на Грузија, Тбилиси, се случуваат масовни протести поради предлог-законот за странски агенти кој пред два дена беше причина и за тепачка меѓу пратениците од власта и од опозицијата во грузискиот парламент.
Предлог-законот предвидува дека организациите кои од странство ќе добиваат повеќе од 20 отсто од својот буџет, треба да се регистрираат како „странски агенти“ и да подложат на мониторинг од страна на Министерството за правда или, во спротивно, ќе се соочат со високи казни.
Ваквиот предлог-закон предизвика бурни реакции во јавноста, која втор ден по ред излегува на масовни протести.
„Ројтерс“ пишува дека на денешните протести пред парламентот на Грузија полицијата употребила солзавец, водени топови и шок-бомби во обид да ги растера демонстрантите. Стотици полицајци, од кои многумина носеле безбедносни штитови, се собрале на улиците околу зградата на парламентот во обид да ги разбијат протестите.
Облаците од солзавец принудиле барем дел од илјадниците демонстранти да се оддалечат од парламентот.
Неколку десетици луѓе претходно ја пробиле металната бариера подигната на одредено растојание од парламентот, но не покажале знаци дека се обидуваат да влезат во зградата на законодавниот дом на Грузија.
Денешните демонстрации се случуваат еден ден по судирите меѓу полицијата и активистите кои резултираа со десетици апсења. Грузиската полиција објави дека во судирите се приведени вкупно 77 лица кои се обвинети за помало хулиганство. Тие наводно фрлале со камења и со лесно запаливи материи кон полициските службеници и физички ги напаѓале.
Судирите следуваат откако пратениците во грузискиот парламент го поддржаа првото читање на нацрт-закон за странски агенти за кој критичарите велат дека ќе ѝ наштети на слободата на печатот и ќе ја турне земјата кон авторитаризам.
Предложениот закон, поддржан од владејачката партија Грузиски сон и одобрен во првото читање ги принудува граѓанските организации кои добиваат повеќе од 20 отсто од своето финансирање од странство да бидат класифицирани како „странски агенти“. Законот беше спореден со законите донесени во Русија каде што сите организации или поединци кои добиваат финансиска поддршка од странство може да се прогласат за „странски агенти“, ознака што ги стигматизира и ги принудува да се подложат на ревизии.
Извор: 360stepeni.mk
