Поранешниот вицепремиер за европски прашања, Бојан Маричиќ емисијата „Само интервју“ на Канал 5 Телевизија, предупредува дека Македонија мора да ги забрза реформите и да ја совлада пречката со уставните измени доколку сака да биде дел од следниот бран на проширување на Европската Унија до 2030 година. Во спротивно, според него, земјата би можела да се соочи со алтернативни модели на интеграција – наменети за држави кои не се сметаат за подготвени.
„Германската влада јасно кажува дека до 2030 е спремна да го поддржи проширувањето – но само ако кандидатите се подготвени. Ако не сме дел од таа група, ќе важат нови, алтернативни модели за интеграција, посебно креирани за проблематичните држави,“ рече Маричиќ.
Според него, Европската комисија и Европскиот парламент веќе ја препознаваат Црна Гора како најнапреден кандидат во преговорите, а на слично ниво се и Молдавија и Албанија. Украина, и покрај комплексната безбедносна ситуација, веќе ги почна преговорите и го завршува скрининг процесот.
„Црна Гора, Молдавија и Албанија се веќе подготвени. Македонија може да се приклучи на тој пакет – но само ако навреме ги направи уставните измени и ги отвори кластерите. Во спротивно, ако чекаме предолго, ќе мора повторно да правиме скрининг поради новото законодавство на ЕУ, што значи големо одложување“, нагласи тој.
Маричиќ потсети и на договорот на германската влада, во кој експлицитно се наведува дека земјите што нема да бидат подготвени за членство до 2030 година ќе бидат предмет на нови, „различни модели“ на интеграција и соработка – модел што, според него, значи помалку јасна перспектива за полноправно членство.
„Ова не е само политичка порака. Тоа е реална временска рамка со последици. Ако останеме надвор, тешко ќе се вратиме во играта под истите услови“, порача Маричиќ.
ИЗВОР: racin.mk
