Убиството на тинејџерот се случило вчера откако тој наводно не ја послушал наредбата на полицаецот да го запре автомобилот. Кога младиот човек ненадејно излегол од автомобилот, полицаецот пукал и смртно го ранил
Необјасниво и непростливо – ова се зборовите кои ги употреби францускиот претседател Емануел Макрон говорејќи за убиството на 17-годишниот тинејџер од страна на полицаец. Неговата изјава доаѓа откако убиството на момчето синоќа предизвика немири низ париските улици.
„Имаме убиен адолесцент, тоа е необјасниво и непростливо. Ништо не ја оправдува смртта на еден млад човек“,
изјави Макрон и го повика судството да си ја заврши работата.
Во париското предградие Нантер, каде што живеело момчето, вчера вечер избувнаа немири. За време на тензиите, млади лица запалиле автомобили и фрлале пиротехнички средства кон полицијата, која, пак, одговорила со солзавец. Во немирите се уапсени најмалку 20 лица.
Убиството на тинејџерот се случило вчера откако тој наводно не ја послушал наредбата на полицаецот да го запре автомобилот. Кога младиот човек ненадејно излегол од автомобилот, полицаецот пукал и смртно го ранил.
Полицискиот службеник е приведен поради сомнение за убиство од небрежност.
Извор: 360stepeni.mk
