АНКАРА (АА) – Францускиот претседател Емануел Макрон и понатаму ја поддржува пензиската реформа, а денес изјави дека реформата на пензискиот систем е неопходна, јавува Анадолу.
Во интервју за France 2 и TF1, Макрон објасни дека оваа реформа „не е луксуз ниту задоволство, туку неопходност“.
Тој рече дека нацрт-законот ќе оди по својот демократски пат, говорејќи првпат од понеделникот кога е усвоен контроверзниот план.
„Оваа реформа мора да стапи во сила оваа година“, рече Макрон.
Тој, исто така, нагласи дека е подготвен да ја изгуби популарноста заради општиот интерес. Тој потсети дека според Уставот повеќе не може да биде кандидат за претседател.
Францускиот претседател изрази доверба во премиерката Елизабет Борн да го води владиниот тим.
Макрон нагласи дека сака повторно да се вклучи во дијалог со социјалните партнери за работните услови.
Тој формулираше три приоритети, целосно вработување, зајакнување на поредокот на Републиката и напредок во образованието, здравството и екологијата.
Француската Влада минатата недела ги искористи специјалните уставни овластувања за спроведување на планот за пензиски реформи, што ги натера партиите што се спротивставија на планот да поднесат барања за недоверба.
Пратениците ги отфрлија двата предлога за гласање недоверба и официјално го усвоија предлог-законот.
Макрон и Борн одлучија да се повикаат на член 49.3 од Уставот, кој е механизам што ѝ овозможува на Владата да усвои предлог-закон без одобрение од Парламентот.
Ваквата одлука е донесена поради стравот дека пратениците би можеле да ги блокираат реформите бидејќи Владата нема апсолутно мнозинство во Парламентот.
Реформите вклучуваат зголемување на старосната граница за пензионирање од 62 на 64 години, како и најмалку 43 години работа за квалификување за целосна пензија. Планот предизвика гнев во јавноста откако беше објавен минатата година, со масовни протести и штрајкови низ целата земја од јануари.
Извор: www.aa.com.tr
