Макрон ја одложи посетата на Германија поради немирите во Франција

Посетата на Емануел Макрон, како што соопштија германските власти, требаше да биде прва државна посета на Германија од страна на француски претседател по 23 години

Францускиот претседател Емануел Макрон ја одложи официјалната посета на Германија поради немирите кои ја зафатија Франција, соопштија германските власти, пренесе Би-би-си.

Посетата на Макрон, како што соопштија од кабинетот на германскиот претседател, требаше да биде прва државна посета на Германија од страна на француски претседател по 23 години.

„Францускиот претседател Емануел Макрон денеска имаше телефонски разговор со својот германски колега Франк-Валтер Штајнмаер и го информираше за ситуацијата во неговата земја. Претседателот Макрон побара да се одложи неговата планирана државна посета на Германија“,

се вели во соопштението на германското претседателство.

Германскиот претседател Штајнмаер, пак, рекол дека жали за откажувањето на посетата, но и дека целосно ја разбира ситуацијата во соседната земја.

Францускиот претседател заедно со сопругата Брижит утре требаше да допатува во тридневна посета на Германија. Покрај средбата со претседателот на Сојузна Република Германија, агендата предидуваше и средба со герамнскиот канцелар Олаф Шолц, како и говор на Макрон во Дрезден за француско-германските односи.

Макрон го одложи своето патување во Германија во момент кога неговата земја се соочува со масовни немири по убиството на 17-годишен тинејџер од страна на француската полиција.

Во насилните протести само изминатата ноќ беа приведени над 1 300 луѓе, а повредени 79 полицајци. Запалени се околу 1 350 автомобили, а опожарени или оштетени се 234 објекти.

• Повеќе од 1 100 уапсени во серијата немири во Франција

За справување со нередите се ангажирани околу 45 000 полицајци, неколку оклопни возила и хеликоптери.