Министерството за образование и наука денеска ја промовираше соработката со Clarivate – Web of science со која се овозможува бесплатно користење на научните бази на оваа платформа до која слободен пристап ќе имаат професори, научници, истражувачи од јавните универзитети во државава и од МАНУ.
Претставници на Clarivate во Скопје ги претставија можностите на платформата Web of science пред членови на македонската академска и научна заедница, откако Владата на седница оваа пролет ја донесе одлуката за соработка и слободен пристап.
Министерството за образование и наука во јули го склучи договорот за пристап до Web of science со сопственикот на базата – Clarivate. Претставникот на оваа компанија, Радек Бучиковски, со негов тим на денешната конференција им објасни на претставници од нашата академска заедница како полесно да ја користат базата и кои ќе бидат бенефитите.
-Clarivate е многу горда на оваа нова соработка со Северна Македонија и навистина ја цениме довербата што ја имате во нас. Ние имаме над шест години искуство работејќи со влади, универзитети и академски заедници во многу земји низ светот. Веруваме дека тоа искуство ќе и помогне на Северна Македонија за унапредување на истражувањата и иновациите, изјави Бучиковски.
Министерката за образование и наука Весна Јаневска соопшти дека со користење на оваа база, научниците, професорите и истражувачите ќе имаат достап до 26 000 списанија и 182 милиони записи во таа база.
-Тоа е важно бидејќи на нашите научници ќе им ја олесни нивната работа, ќе им даде пристап до најновите достигнувања и, она што е во моментов актуелно во светот, ќе им олесни да ги креираат своите трудови, своите проекти. Оваа соработка ќе придоенесе за поголема видливост на нашата научно-истражувачка работа во светот и соработка со видни универзитети. Но, основно е она што ние го имаме за цел – еден од нашите универзитети да го ставиме меѓу првите илјада на Шангајската листа, а за да се позиционира таму потребно е годишно да објавуваат 1200 трудови во списанија со импакт-фактор. За жал, кај нас тоа објавување е на ниско ниво. Очекувам соработката со Web of science да го поткрене нивото – и на квалитетот на трудовите, но и на квантитетот и брзината со која ние ќе можеме да ги исполнуваме условите, изјави Јаневска.
Посочи дека ќе бидат потребни и измени на законите за високо образование и за научно-истражувачка работа во кои, рече, „критериумите за избор ќе бидат малку построги“.
-Односно, државата ќе побара од научниците, професорите, истражувачите, кои сега имаат услови, да и возвратат на државата со тоа што ќе истражуваат и ќе пишуваат, и да поткренеме барем еден од нашите универзитети погоре на таа листа, рече Јаневска.
Министерката додаде дека Владата продолжува да инвестира во науката со тоа што годинава е издвоен буџет од 680 милиони денари од кои, рече, 370 милиони денари се веќе распределени.
-Финансираме објавување на трудови, објавување трудови во списанија со импакт-фактор, учество на наши научници и истражувачи на меѓународни конференции, објавуваме повици за научно-истражувачки проекти, финансираме и поддржуваме меѓународни проекти. Тоа е важно за да го направиме нашето општество попродуктивно, поиновативно и попросперитетно во иднина. Со овој пристап, де факто нашите научници можат да придонесат за развој на општеството, нагласи Јаневска.
Извор: kurir.mk
