Првиот вицепремиер и министер за животна средина и просторно планирање, Изет Меџити, најави проект за целосна реставрација и реновирање на историскиот османски објект „Амамот Шенѓил“ во Скопје. Целта на проектот е зачувување и промоција на културното наследство како основа за градење и едукација на идните генерации.
Меџити истакна дека инвестирањето во зачувување и развој на културно-историските институции е еден од најважните столбови за градење на општество и неговото образование, и дека без грижа за наследството не може да се проектира иднината.
По реконструкцијата, „Амамот Шенѓил“ ќе се претвори во современ културен центар каде ќе се организираат настани од областа на уметноста, музиката, литературата и креативноста. Во објектот ќе се сместат здруженијата „Yeni Yol“, со повеќе од седум децении искуство во зачувување на турската култура и јазик, како и „Lilian“, кој повеќе од една деценија ја промовира босанската култура.
Со овој проект, Меџити посочува дека целта е зајакнување на културниот идентитет, оживување на Чаршијата и позиционирање на општина Чаир како значајна урбана и културна точка во градот.
