Во веста што ја објави државната новинска агенција МИА, а во која не е наведен извор, станува збор за четворица македонски државјани кои се на листата странски државјани што денеска ќе можат да го минат граничниот премин Рафах и да заминат од Газа во Египет
Инаку, според информациите на македонското Министерство за надворешни работи за евакуација од Газа во Египет чекаат петмина македонски државјани
Пограничните власти на Газа рано утрово го објавија списокот со околу 600 странски државјани и лица со двојно државјанство од повеќе земји на кои денеска ќе им биде дозволено да ја напуштат Газа, меѓу нив и државјани на С Македонија.
Во информацијата што ја објави „Њујорк тајмс“, на списокот се имињата на лица од 15 странски земји, меѓу кои и С Македонија.
„На списокот се 400 Американци, како и луѓе од Мексико, Унгарија, Хрватска, Јужна Кореја, Азербејџан, Грција, Чад, Бахреин, Италија, Швајцарија, Шри Ланка, Холандија, Белгија и Северна Македонија“,
се наведува во веста на „Њујорк тајмс“.
Во веста што ја објави државната новинска агенција МИА, а во која не е наведен извор, станува збор за четворица македонски државјани кои се на листата странски државјани што денеска ќе можат да го минат граничниот премин Рафах и да заминат од Газа во Египет.
Преминот беше отворен вчера по повеќе од три недели целосна блокада од страна на Израел, поради што голем број странски државјани и носители на двојни државјанства се најдоа заглавени во Појасот.
Инаку, според информациите на македонското Министерство за надворешни работи, кои и денеска ги потврдија, за евакуација од Газа во Египет чекаат петмина македонски државјани. Како што денеска информираат од МНР, на листата за напуштање на Газа, покрај овие петмина, е и една палестинска државјанка за која велат дека е сопруга и мајка на две деца што имаат македонско државјанство.
Министерството вчера го поздрави отворањето на граничниот премин Рафах, посочувајќи дека тоа ќе овозможи и евакуација на петтемина државјани на земјава.
„Министерството за надворешни работи ја поздравува одлуката за отворање на граничниот премин Рафах, со што се овозможува евакуација на странските државјани, вклучително и петте државјани на Република Северна Македонија.
Како што претходно информиравме, нашите државјани кои се наоѓаат во Газа веќе се вклучени во списоците за евакуација и истото очекуваме наскоро да се реализира согласно околностите на терен и динамиката на евакуација, имајќи го предвид големиот број странски државјани во Газа кои се дел од оваа операција.
Преку тесна и континуирана комуникација со надлежните институции на Египет и Израел како и со нашите државјани, Министерството за надворешни работи е непосредно и континуирано активно вклучено, со цел нашите државјани да бидат безбедно и навремено евакуирани“,
беше наведено во вчерашното соопштение на МНР.
Новиот македонски амбасадор во Тел Авив, Шпенд Садики, минатата недела информира дека во Газа се брачен пар и татко со две мали деца.
Инаку, во веста што ја објави МИА со прецизни бројки е наведено колку странски државјани од секоја од 15-те држави се наоѓа на листата објавена утрово од палестинските погранични власти во Газа.
Така, покрај четворицата македонски државјани, на неа се и граѓани на Азербејџан (8), Белгија (50), Бахреин (6), Чад (2), Хрватска (23), Грција (24), Унгарија (20), Италија/ОН (4), Мексико (2), Холандија (20), Јужна Кореа (5), Шри Ланка (17), Швајцарија (11) и на САД (400).
Вчера повеќе од 400 сопственици на странски пасоши и ранети ја напуштија Газа преку преминот Рафах. Станува збор за првата група луѓе со странски пасоши кои ја напуштија Газа откако беше постигнат договор за отворање на граничниот премин, постигнат со посредство на Катар.
ИЗВОР: 360stepeni.mk
