ИСТАНБУЛ (АА) – Ситуацијата со безбедноста се влошува во нуклеарната централа Запорожје во јужна Украина, откако напад со дрон го погоди патот околу периметарот на централата, соопшти Меѓународната агенција за атомска енергија (МААЕ), пренесува Анадолу.
Претходно, Мисијата на МААЕ за поддршка и помош во Запорожје беше информирана од официјални претставници во електраната, лоцирана во област под контрола на Русија, дека експлозив што го носел дрон експлодирал до границата на заштитеното подрачје на објектот.
Местото на експлозијата било блиску до клучнни акумулации со разладна вода и речиси 100 метри од далноводот Днипровска, единствената преостаната линија од 750 киловолти која ја снабдува централата со електрична енергија.
Мисијата на МААЕ веднаш изврши увид во подрачјето и потврди дека штетата најверојатно е предизвикана од дрон кој носел експлозив. Иако немаше жртви и влијание врз опремата на централата, експлозијата го оштети патот помеѓу двете главни порти на објектот.
МААЕ, исто така, истакна дека била зголемена воената активност во близина на централата во текот на изминатата недела.
„Повторно гледаме ескалација на опасноста од нуклеарна небезбедност и сигурносните опасности со кои се соочува нуклеарната централа Запорожје“, рече шефот на МААЕ Рафаел Маријано Гроси.
„И понатаму сум крајно загрижен и го повторувам мојот повик за максимална воздржаност од сите страни и за строго почитување на петте конкретни принципи одредени за заштита на централата“, додаде Гроси.
Извор: Anadolu Agency (AA)
