Според психологот Рокси Зараби, причините зошто луѓето ја носат оваа „одлука“ се движат од страв од осаменост до чувство на потрошено време во врската, но тоа често води до уште потоксична и безизлезна ситуација.
Иако може да биде тешко и застрашувачки да се започне одново, нема срам во тоа личноста да се избере себеси, да избере искреност и нов почеток – дури и ако на другите им треба време да го прифатат тоа. Според терапевтите и другите советници, луѓето кои остануваат во брак без љубов честопати ги кажуваат следните четири лаги.
1. „Премногу е доцна за нов почеток“
Многу луѓе кои остануваат во брак без љубов веруваат дека е „премногу доцна“ за нив да започнат нов живот, но тоа е само изговор. Без разлика дали имате 25 или 80 години, никогаш не е предоцна да ги ставите сопствените потреби на прво место и повторно да пронајдете среќа.
Почнувањето одново може да биде застрашувачко, но дури и неколку години вистинска слобода и мир вредат повеќе од живот поминат во незадоволство. Луѓето кои живеат свесно, ден по ден, разбираат дека животот и врските се менуваат и дека никогаш не е предоцна за промена, пишува YourTango.
2. „Останувам поради децата“
Психотерапевтот и брачен советник Мел Шварц истакнува дека децата учат преку набљудување на односите на своите родители – нивниот пристап кон љубовта, изборите и комуникацијата го обликуваат нивното разбирање за бракот како возрасни. Затоа изговорот „Останувам поради децата“ честопати прави повеќе штета отколку корист.
Иако разводот може да биде болен и тежок, многу е поштетно за детето да расте во дом без љубов и наклонетост. Давањето прилика себеси и на децата да видат искрен, топол однос со поддршка и разбирање значи да им дадете поздрав пример за љубовта.
3. „Попрво би бил несреќен отколку сам“
Стравот од осаменост е една од најчестите причини зошто луѓето остануваат во врски кои повеќе не ги исполнуваат. Овој страв често произлегува од ниска самодоверба, зависност од туѓото одобрување или финансиска несигурност. Меѓутоа, ако некоја личност не се чувствува добра сама со себе, бракот нема да ѝ донесе мир или сигурност.
Здравиот однос бара рамнотежа помеѓу заедништвото и индивидуалноста, а некој што не може да замисли среќен живот без својот партнер е всушност врзан за врската од погрешни причини.
4. „Не заслужувам подобро“
Многу луѓе ја изедначуваат вредноста на својот живот со квалитетот на врската во која се наоѓаат, што доведува до чувството дека не заслужуваат ништо повеќе. Но, исто како што работата или материјалните добра не одредуваат кои сме, така и односот во којшто сме не мора да ја дефинира нашата вредност.
Ако на некое лице му е тешко да сочувствува со себе и ако не верува дека заслужува мир и среќа, ќе му биде потешко да најде сила да си замине. Сепак, промената е секогаш можна – дури и по многу години, ако врската носи повеќе стрес и вознемиреност отколку поддршка и љубов.
Извор: vecer.mk
