Градоначалникот на Лондон, Садик Кан, сака градот да се кандидира за домаќин на Олимписките игри во 2040 година. Ова ќе биде клучен дел од неговиот план да го претвори најголемиот град во Велика Британија во водечка глобална спортска престолнина.
Според извештај објавен денеска, градот остварил приходи од 230 милиони фунти и привлекол речиси 500.000 спортски фанови само од организација на шест настани, вклучувајќи го финалето на Лигата на шампионите на „Вембли“ и атлетскиот турнир од Дијамантската лига.
-Јас го сакам спортот и ги гледам придобивките од неговото гледање. Мислам дека треба да направиме извештај што ќе го покаже економското влијание што спортот го има врз градот. Мојата амбиција отсекогаш била Лондон да биде светска спортска престолнина. Не е важно дали зборувам за бокс, НФЛ или бејзбол. Зборуваме за тоа како НБА ќе ја донесе кошарката во Лондон. Мислам дека тоа е многу важно. Она што го прави овој извештај е да ја квантифицира економската дивиденда што ја добиваме, изјави Кан за „Тајмс“.
Моментално е во тек кампања за Лондон да биде домаќин на Светското првенство во атлетика во 2029 година. Се очекува владина поддршка од 45 милиони фунти пред да се поднесе официјалното барање во септември оваа година.
Оваа година, Лондон ќе биде домаќин на финалето на Светското првенство во рагби за жени. Англија, Ирска, Шкотска и Велс ќе бидат ко-домаќини на Европското првенство во фудбал во 2028 година. Земјата, исто така, моментално е кандидат за домаќин на Светското првенство за жени во 2035 година.
Доколку градот биде избран за домаќин на Олимписките игри во 2040 година, тој ќе стане првиот што ќе биде домаќин на најголемиот спортски форум четири пати. Претходните случаи беа во 1908, 1948 и 2012 година.
-Сакам да го видам Лондон како првиот град што ќе биде домаќин на Олимписките игри четири пати. Ако го добиеме и Светското првенство во атлетика, тоа ќе биде многу добро за развојот на спортот и ќе ни овозможи да ги имаме новите Мо Фара и Пола Редклиф, додаде Садик Кан. (МИА)
Извор: kurir.mk
