Портпаролката на СДСМ, Богданка Кузеска, на прес-конференција ја обвини владата на ВМРО-ДПМНЕ и ВЛЕН за потенцијален корупциски скандал поврзан со обидот да се „шитне“ паркингот на Клинички центар. Таа изрази сомнеж дека зад оваа одлука се кријат „матни дилови“ и потенцијално местење на тендер за конкретна компанија.
„По бурните реакции на јавноста власта е фатена во тесно, па се обидува да го заташка скандалот Суштинско прашање е дали уште во самото објавување на Огласот од страна на министерството за здравство се распишани услови кои можела да ги исполни само Ѓока констракшн? Дали однапред било се договорено?“ запраша Кузеска.
Според неа, особено скандалозни се условите на договорот, вклучувајќи ги минималните приходи за државата, зголемувањето на цената за паркинг за пациентите и долгиот рок на концесија. „Како е дојдено до скандалозните услови: само 1% од профитот да биде за државата, да има поскап паркинг за пациентите од 50 денари и со сомнителни рокови од 20 години“, праша портпаролката на СДСМ.
Таа истакна дека договорот мора да биде објавен за да се утврди дали бил наместен за одредена компанија. „Дали договорот е однапред наместен за фирмата ‘Ѓока’ може да се открие само со објавување на договорот кој сега велат дека немало да го потпишуваат“ додаде Кузеска, нагласувајќи дека компанијата била под истрага во Албанија откако добила пари за изградба на пат, но истиот не бил целосно завршен, а два тунели се урнале.
СДСМ бара итно расчистување на случајот. „Владата да го објави Договорот со ‘Ѓока’, јавно. Антикорупциската комисија и сите надлежни институции веднаш да отворат постапка за расчистување на случајот“, повика Кузеска. Таа додаде дека граѓаните имаат право да знаат дали тендерот бил наместен за однапред договорена фирма.
„Оваа власт на ДПМНЕ и ВЛЕН мисли дека може да продава државни ресурси на штета на граѓаните, но СДСМ тоа нема да го дозволи! СДСМ е тука да ја заштити државата и народот!“ заклучи портпаролката на СДСМ, Богданка Кузеска.
ИЗВОР: racin.mk
