Британска пратеничка вчера излезе со тврдења дека со возила на итна медицинска помош од Србија во Косово се шверцува оружје и се остава во православните цркви. Од КФОР, пак, потврдија дека такво нешто било пријавено, но наведоа дека не биле пронајдени докази дека тоа се случувало
Косовскиот премиер Албин Курти денеска изјави дека се собираат информации за тоа дали Српската православна црква (СПЦ) е вмешана во шверц на оружје во Косово, тврдење кое претходно го изнесе британска пратеничка.
„По состанокот со безбедносните институции, претставниците на НАТО и КФОР во текот на оваа недела, ќе бидат познати информации во врска со тврдењата дека во српските православни цркви во Косово се шверцува оружје“,
изјави Курти.
Ова доаѓа откако британската пратеничка и претседателка на Одборот за надворешна политика во британскиот парламент Алиша Кренс ја обвини СПЦ дека учествува во шверц на оружје од Србија во Косово.
Во говор во парламентот во Велика Британија вчера таа рече дека оружје од Србија се шверцува со возилата за итна медицинска помош и се истовара во православните цркви.
„Во владата се свесни, со војниците кои штотуку се вратија од служба во КФОР, дека оружје се шверцува со возила на итната помош до православните цркви. Кога нашите трупи се обидуваат да добијат дозвола да отидат таму, дозволите се чекаат предолго. До моментот кога ќе се добие дозволата, итната помош повторно се појавува во црквите и го вади оружјето“,
рекла Кренс, пренесоа вчера регионалните медиуми.
По ова, доцна синоќа со реакција се јавија од Рашко-призренската епархија од каде што наведоа дека станува збор за обвинување со кое се криминализира СПЦ, но и за тврдења кои се злоупотребуваат од одредени косовски медиуми за ширење верска и етничка омраза, што директно ги загрозува свештениците, монасите и верските објекти. Од епархијата побараат итно да се проверат наводите на пратеничката.
Од КФОР, пак, се огласија дека такво нешто било пријавено лани од Кралскиот фусилиски баталјон кој беше ангажиран да служи на северот на Косово за поддршка на мисијата.
„Наводното илегално присуство на оружје пријавено е во штабот на КФОР, но по истрагата за да се проверат наводите, не беа пронајдени докази за тоа што беше пријавено“,
соопштија од КФОР.
Оттаму додадоа и дека безбедносните институции на Косово се оние што се одговорни за владеење на правото во земјата.
Извор: 360stepeni.mk
