Курти бара итно ослободување на косовските полицајци од Србија: Ова е агресија и намера за ескалација

Апелираме до меѓународните фактори да го осудат овој чин на агресија од страна на Србија, порача косовскиот премиер

Со барање за итно ослободување на тројцата уапсени припадници на косовската полиција, попладнево се огласи премиерот на Косово Албин Курти. Тој упати обвинувања кон Белград и го оквалификува чинот како агресија и намера за дестабилизација.

Исто така, изрази сомнеж дека ова е одмазда за вчерашното апсење во Косовска Митровица на Милун Миленковиќ – Луне.

„Се сомневаме дека тие се киднапирани од војската на Србија, јасно како одмазда на војската на Србија за вчерашното апсење на злогласниот српски криминалец, Милун Миленковиќ – Луне, кој се појавува како еден од челниците на организираниот криминал и шверцот. Полицијата на Косово се покажа мошне воздржана последните недели. Влезот на српските сили претставува агресија и намера за ескалација и дестабилизација. Бараме итно ослободување на киднапираните полицајци и апелираме до меѓународните фактори да го осудат овој чин на агресија од страна на Србија“,

напиша Курти.

По приведувањето на тројцата припадници на српската полиција, Приштина обвини дека тие биле киднапирани од маскирани лица од Србија на пат во северно Косово во близина на границата.

Белград, пак, тврди дека косовските полицајци навлегле на српска територија и оти српските сили ги уапсиле дури во централна Србија.