Збирката раскази „Приказничар“ од Жарко Кујунџиски, во издание на „Антолог“, ја доби наградата „Стале Попов“ за најдобро прозно дело, а „Посвети и пофалби“ од Иван Џепароски, во издание на „Дијалог“, наградата „Ацо Шопов“ за најдобра поетска збирка во 2024, соопшти денеска претседателот на Друштвото на писатели на Македонија (ДПМ), Живко Грозданоски. Наградата „Ванчо Николески“ за најдобро дело за деца и млади ја доби книгата „Бакнежи на небото“ од Иван Антоновски, во издание на „Светулка“.
На конкурсот за наградата „Стале Попов“ пристигнале 11 дела од членовите на ДПМ, а одлуката ја донела жири комисијата од претседателката Лилјана Пандева и членовите Петар Андоновски и Блаже Миневски. За наградата „Ацо Шопов“ на конкурсот на ДПМ аплицирале 16 дела. За награденото дело одлучила жири комисијата од претседателката Катица Ќулавкова и членовите Гордана Михаилова-Бошнакоска и Влада Урошевиќ. Десет наслови конкурирале за „Ванчо Николески“, а одлучила жири комисијата на претседателката Билјана С. Црвенковска и членовите Мито Спасевски и Александра Велинова.
За четвртата награда, „Димитар Митрев“ за најдобро дело критика или есеистика, конкурирале вкупно девет наслови, а ја доби „Книжевни паметници“ од Наташа Аврамовска, во издание на Институтот за македонска литература. Одлука донела жири комисијата од претседателката Лидија Капушеска-Дракулеска и членовите Санде Стојчевски и Дејан Трајкоски.
Добитник на наградата „Мост“ за најдобро дело објавено од член на ДПМ на некој од јазиците што го зборуваат националностите во Македонија е „Била једном једна кућа“ („Беше еднаш една куќа“) од Гордана Јовиќ-Стојковска, во издание на „Слово љубве“.
Наградите на добитниците ќе им бидат врачени на 13 февруари во 12 часот.
ИЗВОР: sdk.mk
