ИСТАНБУЛ (АА) – Кривичниот случај против шефот на паравоената група „Вагнер“, Евгениј Пригожин, ќе биде отфрлен и тој ќе замине во Белорусија, изјави портпаролот на Кремљ, Дмитриј Песков, јавува Анадолу.
Гаранција за заминувањето на Пригожин во Белорусија е зборот на рускиот претседател Владимир Путин, нагласи Песков.
Властите нема судски да ги гонат припадниците на „Вагнер“ што учествуваа во бунтот, со оглед на нивните заслуги на линијата на фронтот, рече тој, и додаде дека борците на „Вагнер“ што не учествуваа во вооружениот бунт можат да потпишат договори со руското Министерство за одбрана.
„Москва високо ги цени посредничките напори на Лукашенко“, рече Песков“, истакнувајќи дека „специјалната воена операција“ во Украина ќе продолжи.
Сите тенкови, тешка опрема и борците на „Вагнер“ ја напуштија територијата во близина на седиштето на Јужниот воен округ, јавија руските државни медиуми.
Во петокот „Вагнер“ ги обвини руските сили дека ги напаѓаат нивните борци, а потоа од Украина премина во рускиот град Ростов на Дон.
Како одговор, Федералната служба за безбедност почна кривична постапка против нив за вооружен бунт. Путин го нарече бунтот на Вагнер како чин на „предавство“.
Лидерот на паравоената група, Евгениј Пригожин, рече дека неговите борци ќе тргнат кон Москва, што го натера Кремљ да ги зајакне безбедносните мерки во различни региони во земјата.
Подоцна Пригожин рече дека неговите борци решиле да се вратат назад за да избегнат крвопролевање кога биле на околу 200 километри од руската престолнина Москва, додека белорускиот претседател Александар Лукашенко рече дека разговарал со челникот на „Вагнер“ со согласност на Путин и дека Пригожин прифатил договор за деескалација.
Извор: www.aa.com.tr
