Шефот на СДСМ, Димитар Ковачевски категорично ги демантира гласините дека неговата партија подготвува сценарија за бојкот на вториот круг од претседателските избори, по неповолниот резултат во првиот круг. Вели дека ги повикува граѓаните да гласаат. Од друга страна, што се однесува до одговорноста за резултатот, Ковачевски вели дека СДСМ ќе има отчетен конгрес, а потоа внатрепартиски избори. Шефот на СДСМ не наведува дали бара поддршка од некоја конкретна партија за вториот круг и се повика на изјавата на Пендаровски.
Во меѓувреме, ВМРО-ДПМНЕ не крие дека цели кон поддршка на албанските гласачи во вториот круг од претседателските избори. Од партијата на Мицкоски велат дека добиле доволно гласови од другите етнички групи во првиот округ.
И албанските партии продолжуваат со активностите на терен за да обезбедат поголема поддршка на парламентарните избори. Запрашан за можноста да се одобрат уставни измени веднаш по изборите и пред формирањето на владата, првиот човек на Беса Билал Касами вели дека измените ќе се случат без разлика со која партија ќе коалицираат.
„Владата во која ќе биде коалицијата Вреди, секако дека ќе биде влада која ќе ја гарантира интеграцијата на земјата во Европската унија. И претходно кажавме дека во таква влада ќе биде многу полесно, било со ВМРО или со која било политичка партија, да се направат уставни измени. Затоа, кога велиме дека ќе се направат уставни измени, не сме како ДУИ која десет години владееше со ВМРО и не направи ниту најмал чекор кон интеграција во ЕУ“, изјави Билал Касами, претседател на Беса.
Двајцата претседателски кандидати Гордана Силјановска и Стево Пендаровски повторно ќе се соочат во вториот круг, истиот ден кога политичките партии ќе ги одмерат силите на изборите за пратеници./Алсат.мк
Фатлуме Дервиши
Извор: alsat.mk
