Косово со итна мерка: Целосно го забрани увозот од Србија по „киднапирањето“ на косовски специјалци

Белград тврди дека косовските специјалци навлегле длабоко на територијата на централна Србија, додека Приштина обвинува дека станува збор за киднапирање што се случило на косовската страна од границата

Владата во Приштина одлучи попладнево да го забрани влезот на секој вид стоки од Србија во Косово.

Ваквата одлука доаѓа откако денеска од српските сили беа уапсени тројца специјалци припадници на косовската полиција за кои официјална Приштина и домашните медиуми тврдат дека биле киднапирани од маскирани припадници на српски сили внатре на косовска територија, во близина на меѓудржавната граница на север.

Министерот за внатрешни работи на Косово, Џељаљ Свечља го обвини Белград дека го прекршува „секој договор и секој принцип на меѓународните норми“ и го повика меѓународниот фактот да го зголеми притисокот врз Србија за да ги ослободи косовските полицајци и да запре со провокациите.

Белград, пак, тврди дека апсењето се случило на српска територија бидејќи косовските специјални навлегле длабоко во централна Србија.

„Оваа терористичка банда е уапсена денеска во 12:38 часот длабоко на територијата на централна Србија во атарот на селото Гњилица во општина Рашка“,

рече на вонредна прес-конференција директорот на владината Канцеларија за Косово, Петар Петковиќ.

Тој посочи и дека Србија е подготвена да ги понуди сите докази и повика да се отвори меѓународна истрага доколку е потребно.