Косовското Собрание денеска ќе ја одржи својата конститутивна седница по парламентарните избори одржани на 9 февруари, јави весникот Коха диторе.
На седницата ќе бидат избрани претседател на Парламентот и петмина потпретседатели. Седницата ќе ја водат најстариот и најмладиот пратеник.
Претседателот на Собранието е на предлог од најголемата парламентарна група, а за негов избор е потребно просто мнозинство од 61 пратеник во 120-члениот законодавен дом.
Тројца потпретседатели ќе бидат избрани од трите најголеми парламентарни групи, додека другите двајца ќе бидат претставници на малцинските заедници. Сите петмина мора да бидат изгласани со мнозинство гласови.
По изборот на раководството на Парламентот, ќе започне постапката за формирање на нова влада. Според косовскиот устав, претседателот на државата го предлага мандатарот во консултација со партијата или коалицијата што освоила мнозинство.
На изборите најмногу мандати – 48, освои владејачкото левичарско-националистичко Движење „Самоопределување“ на премиерот Албин Курти. По него следуваат: Демократската партија на Косово (ДПК) со 24, Демократскиот сојуз на Косово (ДСК) со 20 и коалицијата АБК–ИНИЦИЈАТИВА на Рамуш Харадинај со 8 пратеници.
Во косовскиот парламент 20 места се резервирани за малцинските заедници – Срби, Турци, Бошњаци, Роми, Ашкали, Египќани и Горани – без оглед дали го поминуваат изборниот праг од 5 проценти. Од нив, 10 мандати се наменети за српската заедница.
Најголемата партија на косовските Срби – „Српска листа“ – доби 9 мандати, а последниот, десеттиот, го освои граѓанската иницијатива „За слобода, правда и опстанок“ (GI SPO) на министерот за заедници Ненад Рашиќ.
Резултатите покажуваат дека ниту една партија нема самостојно мнозинство за формирање влада, па се очекува коалициски договор за составување на новиот кабинет, јави Радио Слободна Европа – албанска редакција. (МИА)
Извор: kurir.mk
