ПРИШТИНА (АА) – Војниците од Велика Британија кои неодамна пристигнаа како засилување за КФОР патролираат по граничната линија на Косово, јавува Анадолу.
„Британските војници од стратешките резервни сили на НАТО патролираат по граничната линија и обезбедуваат инженерски средства за да помогнат во подобрувањето на безбедноста во локалното училиште во Косово“, се вели на Фејсбук страницата на КФОР.
Се додава дека единицата била мобилизирана по зголемените тензии во Косово, за да се обезбеди способноста на КФОР да го исполни својот мандат за одржување на сигурна и безбедна средина за сите заедници во Косово.
На почетокот на октомври, контингент од 200 британски војници пристигна во Косово за да ја засили мировната мисија на силите на НАТО во Косово (КФОР), по насилниот напад врз косовската полиција на 24 септември и зголемените тензии во регионот. Војниците од првиот баталјон на Кралскиот полк на принцезата од Велс се приклучија на тогашниот британски контингент од 400 војници стационирани во Косово.
