Кои се Американците уапсени во Русија?

Двајца се новинари. Најмалку тројца се сегашни или поранешни воени лица на САД. Друг е учител. Една е обучена танчерка која работи во спа центар во Лос Анџелес.

Повеќе од 10 американски државјани моментално се наоѓаат во руските затвори, обвинети или осудени по обвиненија, – од поседување дрога и кражба, до предавство и шпионажа.

Некои од обвиненијата нашироко се сметаат за измислени или евидентно политички или едноставно смешни. Некои од казните далеку го надминуваат она што правните експерти велат дека би било нормално.

Еден од нив, новинарот на Вол Стрит Журнал, Еван Гершкович, беше на судење во градот Екатеринбург на Уралските Планини на 26 јуни под обвинение за шпионажа што тој, весникот во кој што работи и американската влада, го негираат.

Некои од Американците се сметаат за заложници и можеби се дел од тековните преговори на високо ниво зад сцената за размена на затвореници, при што Русија бара ослободување на сопствените граѓани држени на Запад, вклучително и разузнавач осуден за убиство на Чеченец во Берлин во 2019 година.

Еве еден поглед на Американците за кои се знае дека се држат во Русија.

Еван Гершкович

32-годишникот беше уапсен во март 2023 година додека бил на патување за известување во Екатеринбург. Акредитиран од руското Министерство за надворешни работи и со седиште во московското биро на Волстрит журнал, Гершкович беше обвинет дека се обидел да пристапи до доверливи информации.

Гершкович беше првиот американски новинар кој беше уапсен под обвинение за шпионажа во постсоветска Русија. Претходно овој месец, обвинителите го обвинија дека работел за ЦИА. Весникот остро го отфрли обвинението, нарекувајќи го случајот против него, лажен.

Гершкович, кој е затворен во озлогласениот московски затвор Лефортово, официјално е означен како „погрешно притворен“ – категоризација за конкретни граѓани на САД, која суштински им дава приоритет на напорите и ресурсите на американската влада со цел да ги ослободи.

Алсу Курмашева

Двојна американско-руска државјанка и уредничка од Прага во Татарско-башкирскиот сервис на Радио Слободна Европа/Радио Слобода, Курмашева првпат беше приведена во градот Казан во регионот на Волга во јуни 2023 година, додека ја посетуваше нејзината мајка.

Властите првично ја обвинија дека не го пријавила американското државјанство и и ги одзедоа пасошите. Таа беше приведена четири месеци подоцна, обвинета дека не се регистрирала како „странски агент“. Руските власти го искористија деценискиот закон за „странски агенти“ за да ги таргетираат новинарите, дисидентите, активистите на граѓанското општество и другите кои добиваат средства надвор од земјата.

Во декември 2023 година, обвинителите поднесоа дополнително обвинение, обвинувајќи ја за ширење невистини за војската. Таа може да биде осудена на 10 години затвор доколку биде осудена.

Семејството на Курмашева (47), која е задржана во преполн објект во Казан, и РСЕ ги негираат наводите. Таа не е означена како незаконски притворена.

Пол Вилан

Вилан беше уапсен во декември 2018 година, додека беше во посета на Москва на свадба на пријател, и беше обвинет дека примил компјутерски флеш диск што содржел доверливи информации.

Поранешен американски маринец, кој во тоа време работеше како извршен директор за корпоративна безбедност, Вилан рече дека бил наместен и дека мислел дека на уредот имало фотографии од одмор од негов пријател.

Во јуни 2020 година, рускиот суд го осуди за шпионажа и го осуди на 16 години затвор. Времето главно го помина во затвор во централниот регион на Мордовија.

Семејството на Вилан и американската влада го нарекоа неговото судење измама и исмејување на правдата.

Вилан (52), кој исто така има британско, канадско и ирско државјанство, е означен како незаконски приведен.

Марк Фогел

Наставник во англо-американското училиште во Москва, сега затворено училиште, основано од амбасадите на САД, Канада и Велика Британија, Фогел беше уапсен во август 2021 година кога пристигнал на московскиот аеродром Шереметјево, носел мала количина — околу 14 грама — марихуана.

Тој рече дека марихуаната била за медицински цели – за лекување долгогодишни проблеми со грбот – и дека лекар од САД му дал рецепт.

Обвинителите, без докази, тврдеа дека тој имал намера да ја продаде дрогата на студенти. Во јуни 2022 година, тој беше осуден за трговија со дрога и осуден на 14 години затвор. Од времето на неговото изрекување на пресудата, тој требаше да биде префрлен во објект во областа Јарослав, североисточно од Москва.

Во судската постапка, тој рече дека направил грешка со внесувањето на супстанцијата во Русија и изрази жалење.

Минатата недела, мајката на Фогел поднесе тужба до американскиот суд, барајќи да го принуди Стејт департментот да го назначи Фогел како незаконски притворен.

Гордон Блек

Наредникот од штабот на американската армија, кој бил на активна должност во Јужна Кореја, Блек (34), беше уапсен во мај во пристанишниот град Владивосток на Тихиот Океан, каде што отпатувал за да се сретне со Русинка со која бил интимно поврзан.

Блек беше обвинет за кражба и упатување смртни закани кон жената, која поднела пријава до обвинителството.

На 19 јуни, судот во Владивосток го прогласи за виновен и го осуди на четири години затвор.

По неговото апсење, РСЕ идентификуваше сметка на ТикТок која и припаѓаше на жената која изгледаше дека е негова девојка.

Веднаш не беше јасно каде е задржан.

Ксенија Карелина

Карелина (33) беше приведена од Федералната служба за безбедност, главната руска домашна разузнавачка агенција, во јануари во Екатеринбург, каде што отпатувала да се сретне со роднините.

Карелина, жител на Лос Анџелес и американски државјанин од 2013 година, првично беше обвинета за хулиганство, наводно за пцуење на полицајци.

Безбедносните агенти, сепак, го пребарале нејзиниот телефон и откриле дека пред да отпатува во Русија, таа донирала 51 долар на организација со седиште во САД која обезбедува помош за Украина. Потоа беше обвинета за предавство.

Таа го имаше своето прво појавување пред судот во Екатеринбург на 20 јуни. Се соочува со затворска казна до 12 години доколку биде осудена.

Јури Малев

Уапсен во декември 2023 година поради објави на социјалните мрежи во кои ја критикуваше руската воена симболика, Малев, двоен американско-руски државјанин, беше осуден на 3 и пол години затвор од судот во Санкт Петербург на 5 јуни.

Судот го прогласи Малев за виновен за „рехабилитација на нацизмот“ за неговото исмејување на лентата на Свети Ѓорѓи, која беше прифатена од Кремљ и националистите како симбол на руската воена историја и величина.

Во соопштението објавено од судот во Санкт Петербург се вели дека Малев ја признал вината. Неговиот адвокат рече дека казната била невообичаено строга за првпат сторителот.

Руските новински извештаи велат дека Малев живеел во САД од 1991 година, а неодамна работел како обезбедување во спортски објект во Њујорк и дека редовно патувал во Русија за да ги посети роднините.

Веднаш не беше јасно каде е задржан.

Роберт Гилман

Поранешниот американски маринец Гилман беше обвинет за напад на руски полицаец додека бил пијан во воз во јануари 2022 година. Во руските новински извештаи се вели дека тој бил во Русија за да го проучува јазикот.

Во октомври 2022 година, судот во Воронеж, јужно од Москва, го осуди на 4 и пол години затвор.

Гилман изрази каење за нападот, но рече дека казната е строга и дека е жртва на политичка репресија.

Апелациониот суд подоцна му ја намали затворската казна на 3 и пол години.

Не е јасно каде е задржан Гилман.

Еуген Спектор

Спектор, кој е роден во Русија, но поголемиот дел од својот живот го живеел во Соединетите држави, беше уапсен во февруари 2020 година, обвинет за обид за поткуп на врвен соработник на тогашниот вицепремиер Аркадиј Дворкович.

Помошникот, Русинката Анастасија Алексеева, исто така беше осудена за примање мито, во форма на платени патувања во Тајланд и на други места, од Спектор, кој беше поранешен врвен извршен директор во руска фармацевтска компанија.

Спектор, кој е познат и како Евгениј, се изјасни за виновен и беше осуден на 3 и пол години затвор во април 2023 година.

Во август 2023 година, само неколку дена пред да биде ослободен, московскиот суд додаде посериозно обвинение за шпионажа против Спектор. Деталите за обвинението, сепак, не се објавени.

Како и Гершкович, се верува дека Спектор бил затворен во московскиот затвор Лефортово, каде што се држат скоро сите луѓе обвинети за шпионажа пред судењето.

Роберт Вудленд

Роден во Русија, кој како дете бил посвоен од американски родители, Вудленд бил уапсен од руската полиција во јануари под обвинение за поседување дрога.

Во моментот на апсењето, Вудленд наводно работел како професор по англиски јазик надвор од Москва. Судските документи го идентификуваа по неговото руско презиме Романов, но не беше јасно дали има руско државјанство. Новинската агенција Интерфакс соопшти дека тој е руски државјанин.

Во 2019 година, Вудленд се соединил со својата биолошка мајка, повторна средба што беше прикажана на руската државна телевизија. Тој се преселил во Русија една година подоцна, а бил интервјуиран од таблоидот Комсомолскаја Правда, кој вели дека првично бил посвоен од регионот Перм.

Вудленд го имаше своето последно појавување пред судот во Москва во април и беше наредено да се задржи во очекување на дополнителни сослушувања.

Мајкл Лик

Музичарот и поранешен американски воен падобранец, Лик беше уапсен под обвинение за поседување и дистрибуција на дрога во 2023 година.

Лик, кој имаше 51 година за време на неговото прво појавување на суд во јуни 2023 година, беше идентификуван од руските медиуми како музичар со рок бенд наречен Лови Ноч.

Новинската агенција Интерфакс објави дека кога Лик првично дошол во Москва, работел како професор по англиски јазик и помагал во преводот на песни за руски рок бендови.

Стејт департментот подоцна го потврди притворот на Лик и рече дека официјални лица од американската амбасада присуствувале на неговото судење. Но, не беа објавени дополнителни информации, а не беше веднаш јасно каде е притворен или статусот на неговиот судски случај.