Директорот на Фондот за здравство, Сашо Клековски, гостувајќи во емисијата „Клик Плус“ на ТВ21, најави иницијатива за повторно отворање на Центарот за трансплантација. Тој посочи дека заедно со директорот на Клиниката за Онкологија, Бајрами, разговарале за обезбедување дополнителни средства за негово реновирање и ставање во функција, откако беше затворен за време на пандемијата и привремено пренаменет во ковид-центар.
Клековски истакна дека покрај ова, во дополнителниот буџет на Клиниката се разгледуваат и средства за поттикнување на трансплантации, како и други медицински интервенции.
Говорејќи за проблемите во здравствениот систем, Клековски ја критикуваше претходната влада, нагласувајќи дека недостигот на стратегија е долгогодишен проблем.
„Лицемерно е оние што го водеа здравството со години сега да критикуваат последици од сопственото работење. Недостасува стратегија за развој на здравствената мрежа во Македонија. На пример, зависни сме од еден ПЕТ-скен апарат и од еден добавувач на суровини. Ако дојде време за сервисирање, нема алтернатива“, рече Клековски, додавајќи дека требало да се создаде план Б за идни дефекти и сервиси.
Како уште еден пример за пропусти во здравството, тој го посочи случајот со компјутерската томографија во Струмица, која не работи девет месеци.
„Не бегаме од критики, но овој проблем потекнува од времето на претходната власт. СДСМ не направи доволно за да го реши. Ние веќе обезбедивме средства и за поправка и за набавка на нов апарат, но постапката за набавка двапати пропадна“, објасни Клековски.
Клековски укажа дека Македонија не може да функционира со еден онколошки центар за целата земја.
„Не е одржливо два милиони луѓе да зависат од еден онколошки центар. Бугарија, на пример, има 35 болници каде што се аплицира таргет-терапија. Мораме да го децентрализираме системот, и тоа треба да биде дел од стратегијата“, истакна тој.
Во однос на скапите терапии, Клековски најави дека за наредната година се планираат нови мерки.
„Бројот на пациенти ќе расте, животниот век се продолжува, а количините на лекови ќе бидат сè поголеми. Ако не најдеме начин да ги намалиме цените, финансиски нема да можеме да го издржиме тој товар“, предупреди тој.
Во таа насока, тој се изјасни против безусловното вклучување на сите фармацевтски компании на позитивната листа.
„Ќе ги вклучиме само оние што ќе понудат најниска цена, најблиску до референтната. Во моментов дозволуваме влез и на компании со цени трипати повисоки од утврдените стандарди“, нагласи Клековски.
Еден од главните предизвици во здравството, според Клековски, е недостатокот на кадар во руралните подрачја.
„Во Дебар има 10 невработени лекари, а истовремено има празни места за матични доктори. Но, луѓето не сакаат да работат како матични лекари бидејќи оваа професија е финансиски потценета“, објасни тој.
Клековски посочи дека македонскиот здравствен систем е застарен и мора да се адаптира на актуелните потреби.
„Клиничкиот центар троши половина од целото јавно здравство. За лекови против рак, пациентите од Дебар, Пробиштип или Струмица мора да патуваат до Скопје. Тоа мора да се промени“, заклучи тој.
ИЗВОР: ТВ 21
