Кинескиот министер за надворешни работи ги критикуваше „неоснованите обвинувања“ на НАТО

ИСТАНБУЛ (АА) – Кинескиот министер за надворешни работи Ванг Ји ги осуди „неоснованите“ обвинувања на НАТО против Кина, јавува Анадолу.

„Кина никогаш нема да ги прифати овие обвинувања“, рече Ванг, коментирајќи ја декларацијата на НАТО во која се вели дека Пекинг е „одлучувачкиот двигател“ на руската војна против Украина.

Тој вчера телефонски разговараше со холандскиот колега Каспар Велдкамп, при што му рече дека „Кина отсекогаш била сила за мир и стабилност во меѓународната заедница“.

„Кина и земјите од НАТО имаат различни политички системи и вредности, но тоа не треба да биде причина НАТО да поттикнува конфронтација со Кина“, рече Ванг.

Декларацијата на НАТО, објавена во средата, ја обвинува Кина дека значително ја поддржува руската одбранбена индустрија и овозможува воени акции на Москва во Украина.

Кина, како постојана членка на Советот за безбедност на Обединетите нации, беше повикана да ги прекине сите форми на помош за воените активности на Русија.

„Вистински начин е да се зајакне дијалогот, да се унапреди разбирањето, да се воспостави основна меѓусебна доверба и да се избегнат стратегиски погрешни процени“, рече кинескиот министер за надворешни работи.

Ванг ја повика 32-члената воена алијанса „да ги почитува своите должности, да не се меша во азиско-пацифичките работи или во внатрешните работи на Кина и да не ги оспорува легитимните права и интереси на Кина“.

„Кина е подготвена да одржува контакт со НАТО на рамноправна основа и размена врз основа на заемно почитување“, рече Ванг.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.