Кина: Апсурден е коментарот на Бајден за Ѓинпинг

Забелешките на американската страна се крајно смешни и неодговорни, тие сериозно ги нарушуваат основните факти, дипломатскиот протокол и политичкото достоинство на Кина. Тоа е бесрамна политичка провокација. Кина изразува силно незадоволство и противење, вели портпаролката на Министерството за надворешни работи

Коментарот на претседателот Џо Бајден, во кој кинескиот претседател Си Ѓинпинг го нарече диктатор, за Кина е крајно апсурден и неодговорен.

„Забелешките на американската страна се крајно смешни и неодговорни, тие сериозно ги нарушуваат основните факти, дипломатскиот протокол и политичкото достоинство на Кина. Тоа е бесрамна политичка провокација. Кина изразува силно незадоволство и противење“,

изјави портпаролката на Министерството за надворешни работи Мао Нинг, а пренесуваат странските агенции.

Американскиот претседател Џо Бајден вчера го нарече кинескиот претседател Си Ѓинпинг диктатор и додаде дека Ѓинпинг бил многу засрамен кога неодамна беше соборен кинески шпионски балон што леташе над САД.

Бајден ова го изјави на собирање средства во Калифорнија, еден ден откако американскиот државен секретар Ентони Блинкен се сретна со Ѓинпинг во Пекинг, со цел да се намалат тензиите и ривалството меѓу двете земји.

„Причината зошто Си Ѓинпинг толку се вознемири кога го соборив балонот со два вагона шпионска опрема, е затоа што не знаеше дека е таму. Голема штета е за диктаторите. Кога не знаеја што се случило. Не требаше да оди таму каде што беше“,

рече Бајден.

Нинг го повтори тврдењето на Кина дека балонот бил наменет за метеоролошки истражувања и дека бил соборен случајно.

„САД требаа да се справат со тоа на мирен и професионален начин. Сепак, САД ги искривија фактите и употребија сили за да го подигнат инцидентот, целосно откривајќи ја својата природа на малтретирање“,

рече Нинг.

Балонот на почетокот на февруари една недела леташе над САД и Канада, а беше соборен по наредба на Бајден над Атлантскиот Океан. Тој инцидент, кој предизвика Блинкен да ја одложи првично планираната посета на Пекинг, како и размена на посети меѓу американските и тајванските официјални лица, ги зајакна тензиите меѓу САД и Кина.