КФОР тврди дека не бил во областа каде беа уапсени косовските полицајци и бара Приштина и Белград да ги смират тензиите

Двете страни веднаш да ги намалат тензиите и да се воздржат од еднострани дејствија, побара Мисијата на НАТО

Мисијата на НАТО во Косово (КФОР) соопшти дека „не била во областа кога српската полиција уапсила тројца косовски полицајци“ и ги повика Косово и Србија веднаш да ги намалат тензиите и да се воздржат од еднострани дејствија.

„КФОР испрати тим во областа и воспостави контакти со претставници на косовските институции и српските власти. Ги повикуваме двете страни веднаш да ги намалат тензиите и да се воздржат од еднострани дејствија што можат да доведат до натамошна ескалација“,

пишува во соопштението од КФОР.

Од Мисијата додаваат дека ја следат ситуацијата и продолжуваат целосно да го спроведуваат мандатот на ОН, врз основа на Резолуцијата 1244 на Советот за безбедност на ОН, од 1999 година, во обезбедувањето мирна средина, слободно движење на сите заедници во Косово, како и продолжување со обезбедување неопходна безбедносна рамка за подобрување на дијалогот под покровителство на ЕУ за нормализација на односите меѓу Косово и Србија.

Настанот со тројца косовски полицајци се случи пред дена. Приштина тврди дека тоа било киднапирање извршено од страна на српските власти на територијата на Косово. Белград, пак, тврди дека настанот не се случил во Косово, туку дека полицајците навлегле на територија на Србија и поради тоа не станува збор за киднапирање, туку за апсење.