Поранешниот руски командант Игор Гиркин тврди дека Русија во иднина може да се соочи со побуна од Вагнер групата и нејзиниот лидер Евгениј Пригожин.
Вагнер се едни од најпосветените и најефикасни војници кои се борат на руска страна а Пригожин има блиски односи со рускиот претседател. Вагнеровци се доста видливи во тековниот конфликт во Украина, особено во битката за Бахмут, во која Пригожин призна дека илјадници негови луѓе биле изгубени.
Тој неодамна објави дека неговите борци ќе се повлечат од Бахмут до 1 јуни, предавајќи им „позиции, муниција, вклучително и суви оброци“ на регуларните руски војници.
Притоа, олигархот познат како „готвачот на Путин“ (неговите ресторани обезбедуваат кетеринг за Кремљ) упати непријатни критики кон високите воени лица за нивното справување со Бахмут и оцени дека инвазијата има дадено контра-ефект.
„Во однос на демилитаризацијата…ако на почетокот на специјалната операција имаа 500 тенкови, а [сега] имаат 5.000 тенкови“, го пренесува Њусвик. „Ако имаа 20.000 луѓе обучени за борба а сега имаат 400.000 луѓе, како ги демилитаризиравме?
Со ваквите коментари, според Гиркин, некогашен воен командант на сепаратистичките сили во Донбас, Пригожин прави терен за евентуален бунт и пуч на Вагнер во Кремљ.
Гиркин проценува дека изгледите за бунт зависат од рускиот одговор на претстојната украинска контра-офанзива и дека ако Русија доживее сериозни порази на фронтот, политичката ситуација во Русија може значајно да биде сменета до крајот на летото.
ИЗВОР: off.net.mk
